பொதிந்து கிடந்த புன்னகை

ஆங்கிலப் பள்ளியில்

அடிவாங்கும் குழந்தை அழுகிறது….

அம்மாவென்று

     தாய்மொழியின் பெருமையை, வலிமையை இதைவிட எளிமையாய், இனிமையாய், உண்மையாய் சொல்ல யாரால் முடியும்.

என் இல்லத்தில்

எவரெவருக்கோ

இலைபோட்டு

உணவளித்து மகிழ்ந்த

இந்த கை . . .

கை நீட்டுகிறது

ஆதரவற்றவளாய்

முதியோர் இல்லத்தில் . . .

     கூட்டுக் குடும்பங்கள் முற்றிலுமாய் சிதைந்து, உறவின் மேன்மைகள் உருக்குலைந்து, பெற்றவளைக் கூட ஒதுக்கி வைத்துவிட்டு, தான் மட்டும் சுகமாய் வாழ நினைக்கும் சமூகத்தின் அவலத்தை, இதைவிட அதிகமாய் வெளிச்சம் போட்டுக் காட்ட யாரால் முடியும்.

வீடடுக்கொரு

மரம் வளர்க்க ….

வீடுதோறும்

மழைநீர் சேகரிக்க ….

வீட்டுக்கொரு

கழிப்பறை

கட்ட சொன்னீர்….

எல்லாம் சரி

வீடு … ?

      நமது தேசத்தின் நிலையினை, சுதந்திரம் பெற்று எழுபது ஆண்டுகள் ஆகியும், குடியிருக்க ஒரு குச்சு வீடு கூட, இல்லாமல், பரிதவிக்கும் ஏராளமான மக்களின் நிலையினை, இதைவிட யாரால் கை நீட்டிச் சுட்டிக்காட்ட முடியும்.

இந்தியா கேட்

திறந்தே கிடக்கிறது

யார் யாரோ

உள்ளே ….

நம் வீட்டுக் கதவு

மூடிக்கிடக்கிறது

நாமெல்லாம்

வெளியே ….

      வீட்டின் நிலையினை மட்டுமல்ல, நாட்டின் நிலையினையும், வெட்ட வெளியில், இதைவிட உரத்து முழங்க யாரால் முடியும்.

நீட் வந்தது

நிம்மதி போனது ….

தேர்வு எழுதப்

போன நாங்கள்

திகைத்து நின்றோம் …

தேர்வு மையமா?

பரிசோதனைக் கூடமா?

ஆடையை கழற்றி

அலங்கோலப் படுத்தினீர்…

என்ன குற்றம் கண்டீர் …

நடுத்தெருவில் நிறுத்தி

பரிசோதித்துப் பதட்டப் படுத்தினீர்

     படிக்கப் படிக்கப் பதட்டம், நம்மையும் தொற்றிக் கொள்கிறது. ஏன் இந்த நிலைமை நமக்கு. எதனால் இந்த இழிநிலை. இதைவிட யாரால் கவிகொண்டு பொங்கி எழ முடியும்

வறண்ட மார்பினை

வருடுகிறது

பச்சிளம் குழந்தை

ரணமானது …

மனசும் மார்பும்

     நம் மனமும் காயப்பட்டுத்தான் போகிறது. வறுமையை இதைவிட வலிமையாய்க் கூற யாரால் முடியும்.

ஆடை கிழிந்து

ஆலய வாசலில்

அவலமாய் ஒருத்தி.

அவளைத் தாண்டி

வரிசையில் நின்று

அம்மனுக்கு

சாத்துகிறார்கள் திருப்பட்டு

     ஆன்மீகம் என்ற பெயரில் மனிதம் மறந்து, தெய்வம் போற்றும், மக்களை இதைவிட வன்மையாய்ச் சாட, யாரால் முடியும்.

சாகுபடி செய்த

விவசாயியை

சாகும் படி செய்தது

சாகுபடி

    நெஞ்சுக்குள் சிக்கிக் கொண்ட முள்போல் நிற்கும், நிதர்சனத்தை, இதைவிட உண்மையாய் உரைக்க வேறு யாரால் முடியும்.

உனக்கென்ன

அரசாங்க உத்யோகம் ….

நண்பன் சொல்லி

நகர்ந்தான் …

அரசு ஊழியனின்

அவலம்

அவனுக்கென்ன

தெரியும்?

……………….

…………………

பிள்ளைகள் படிப்பு

மருத்துவம்

உற்றார் உறவினர்

வைபோகங்கள்

இப்படி

ஒட்டிக் கிடக்கிறது

ஊதியத்திலிருக்கும்

ஒவ்வொரு

ரூபாய் நோட்டுக்கும்

ஒரு செலவு.

குடி நீர் துவங்கி

குளியல் நீர் வரை ….

வீட்டிலிருந்து வெளியேறி

வீட்டுக்குள் நுழையும் வரை

காசு .

…………………

இதுதான்

எங்கள் வாழ்க்கை

என்று எவருக்கிங்குப் புரியும்… ?

      படிக்கப் படிக்க, கவிஞரின் கரம் பற்றிக் குழுக்கி மகிழ விளைகிறது மனம்.

      இவர் எந்தச் சூழலையும் தனதாக்கிக் கொண்டு வளர்வதில், அனைவரையும் வசப்படுத்துவதில் வல்லவர்.

     பூ மனசுக்குச் சொந்தக்காரர். எதிலும் சட்டென நெகிழ்ந்துவிடும் குணம் கொண்டவர்.

     இவரது நகலகத்தில், நாற்காலிகள் நிரம்பி வழியும். கவிஞர்கள் சங்கமிக்கும் அசலகம், இவர் நகலகம்தான்.

     எளிய மொழியும், கனிந்த குரலும்தான் இவரது கவிதையின் குணங்கள்.

     இவர் வதனத்தில் எப்போதும் ஒரு புன்னகை பொதிந்து கிடக்கும்.

பொதிந்து கிடந்த புன்னகை

தனது குணத்தையே, தனது நூலுக்கும் தலைப்பாக்கியவர் இவர்.

தீயவை பார் …..

தீயவை கேள் …..

தீயவை பேசு ….

அப்போதுதான்

நல்லவை புரியும் ….

இவர்தான்

புதுகை பூவண்ணன்

புதுகைப் புத்தகத் திருவிழாவில்,

கவிஞரின் அறிமுகமும்.

பரிசாய் ஒரு புன்னகையும்,

அன்பளிப்பாய் ஒரு புத்தகமும்

கிடைத்தமையை எண்ணி மகிழ்கின்றேன்.

-------

மேன்மை வெளியீடு.,

5/2, பெர்தோ தெரு,

இராயப் பேட்டை  வி.எம் தெரு,

சென்னை 14

விலை ரூ.80