15 பிப்ரவரி 2016

கரைவெட்டி



கடந்த 7.2.2016 ஞாயிற்றுக் கிழமை, உமாமகேசுவர மேனிலைப் பள்ளியில், உடன் பணியாற்றும் சக ஆசிரியரும், உறவினருமான திரு மு.பத்மநாபன் அவர்களின், மகளின் திருமணம் அரியலூரில் நடைபெற்றது.

    உமாமகேசுவர மேனிலைப் பள்ளித் தலைமையாசிரியரும் நண்பருமான திரு வெ.சரவணன் அவர்களும், நண்பர்கள் திரு க.பால்ராஜ், திரு பா.இராசேந்திரன், திரு எஸ். சேகர், திரு பா.கண்ணன், திரு ஆர்.அறிவழகன், நான் மற்றும் எனது மனைவி என எட்டு பேர் வாடகை மகிழ்வுந்தில் அரியலூர் சென்றோம். திருமண நிகழ்வில் பங்குபெற்றோம்.

   தஞ்சை திரும்பும் வழியில் கீழப்பழுவூர் வந்தடைந்தோம். கீழப்பழுவூர், திருமானூர் சாலையில், வலது புறம் திரும்பிப் பயணிக்கும் சாலையில், ஓர் பெயர்ப் பலகை.



கரைவெட்டி பறவைகள் சரணாலயம்
தங்களை அன்புடன் வரவேற்கிறது.

    பலமுறை இவ்வழியே சென்றிருக்கிறேன். ஒவ்வொரு முறையும் ,பெயர் பலகை, அன்போடு அழைத்துக் கொண்டேதான் இருக்கிறது. ஆனாலும் அந்த அன்பு அழைப்பை இதுநாள் வரை ஏற்றதில்லை.

     இம்முறை மனதில் ஓர் ஆசை. பறவைகள் சரணாலயத்தைப் பார்க்கலாமே என்னும் ஓர் உந்துதல்.

பறவைகள் சரணாலயத்தைப் பார்க்கலாமா? நண்பர் திரு வெ.சரவணன் அவர்களிடமிருந்து, எனது ஆசை வார்த்தையாகவே வெளிப்பட்டது.

    அனைவருமே பார்ப்போம் என்றனர். மகிழ்வுந்து வலது புறம் திரும்பி, சரணாலயத்தின் திசை நோக்கிப் பயணிக்கத் தொடங்கியது.

       பத்தே நிமிடம், ஐந்தே ஐந்து கிலோ மீட்டர்தான். மீண்டும் வலதுபுறம் திரும்பினோம். ஒரு சிறிய தார்ச்சாலை. சிறு சிறு கருங்கற்கள் தரையினைப் பிளந்து கொண்டு வெளிக் கிளம்பி, கருங்கல் சாலையாய் காட்சி அளித்தது.

      இடது புறம் வயல் வெளிகள். வலது புறம் நீண்ட நெடிய ஏரி. கப்பிச் சாலையும், சிறிது தூரத்தில் முடிவுக்கு வந்தது. மகிழ்வுந்தில் இதற்கு மேலும் செல்ல வழியில்லை.

      இறங்கி நடந்தோம். ஏரிக் கரையில் இரண்டு தளங்களை உடைய, ஒரு பார்வையாளர் மாடம். இரண்டாம் தளத்தின் மேல் திறந்த வெளி.

       இதோ எங்களின் கண்களுக்கு முன்னால், கண் பார்வையினைக் கடந்தும், பரந்து விரிந்த, சமுத்திரம் போல் ஏரி. ஏரியெங்கும் மரங்கள், நீர்த் தாவரங்கள் பரவிக் கிடக்கின்றன.

இதுதான்
கரைவெட்டி பறவைகள் சரணாலயம்.

     454 ஹெக்டேர் பரப்புடையப் பெருங்கடல். காவிரி ஆற்றாலும், மழை நீராலும் நீர் பெற்று, நிரம்பி வழியும் பெரும் ஏரி இது.

    புள்ளம்பாடி மற்றும் கட்டளாள் கால்வாய்களும், இந்த ஏரிக்கு, வள்ளல் தன்மையோடு நீரினை வாரி வழங்குகின்றன.

      கரைவெட்டி ஏரியைப் பற்றிய ஆச்சரியத்திற்கு உரிய செய்தி என்னவென்றால், தமிழகத்தின் ஆறுகள் ,குளங்கள், ஏரிகள் அனைத்தும் மார்ச் மாதத்திற்குள்ளாகவே வற்றி வறண்டு போய் விடும் சூழலில், இந்த கரைவெட்டி ஏரி மட்டும், கடும் கோடையான மே மாதத்திலும் கூட, நீர் தவழும் ஏரியாய் காண்பவர் கண்களையும் மனதினையும் கொள்ளை கொள்ளுகிறது.

     இந்தியப் பறவைகள் மட்டுமல்ல, பல வகையான வெளிநாட்டுப் பறவைகளும் நாடி வந்து  ஓய்வெடுக்கும் சரணாலயமாய் கரைவெட்டி சரணாலயம் விளங்குகிறது.

       டிசம்பர் மற்றும் சனவரி ஆகிய இரு மாதங்களில், ஏரியின் மரங்கள் எங்கும் பறவைகள், பறவைகள், பறவைகள் என இப்பகுதியே பறவைகளால் நிரம்பி வழியும்.

        நவம்பர் மாதத்தில் பறவைகளின் வரவு தொடங்கும். மே மாதம் வரை பறவைகளின் சொர்க்கமே இந்த கரைவெட்டிதான்.

      பதினாறு வகையான வாத்துகள், 23 வகையான நீண்ட கால்களை உடைய வேடர் இனப் பறவைகள் எனப் பல்வேறு பறவை இனங்களின் வசந்த மாளிகைதான் இந்தக் கரைவெட்டி.

      சனவரி மாதத்தில் மட்டும், கரைவெட்டியில் பள்ளி கொள்ளும் பறவைகளின் எண்ணிக்கை 50,000 என்பதில் இருந்தே, இந்த கரை வெட்டியின் பெருமை நன்கு விளங்கும்.


    இடது புறம் வயல் வெளியில், ஒரு டிராக்டர், வயலினை உழுது கொண்டிருக்கிறது. டிராக்டருக்கு முன்னே, இராணுவ அணிவகுப்பைப் போல் கொக்குகள்.


     டிராக்டரின் இயக்கத்திற்கோ, ஓசைக்கோ சிறிதும் அஞ்சாமல் கொக்குகள் வரிசையாய். டிராக்டர் நகர, நகர வயலின் மண் கீழும் மேலுமாய் புரட்டிப் போடப் படுகிறது. புழுதி கிளம்புகிறது.

      கொக்குகள் புழுதிக்குள் அஞ்சாமல் நுழைந்து, புரட்டிப் போடப்படும் மண்ணில் இருக்கும், மண்புழுக்களை, சளைக்காமல் வேட்டையாடுகின்றன. வியந்து போய் பார்த்தோம்.

      பின் ஏரிக் கரையின் ஓரத்தில் அமைந்திருக்கும் இரண்டு அடுக்கு, பார்வையாளர் மாடத்தில் ஏறினோம்.

      ஏரியின் அழகு, கண்கொள்ளாக் காட்சியாய் கண் முன்னே விரிந்தது. ஏரியெங்கும் நீர்த் தாவரங்கள். நீர்த் தாவரங்களின் உச்சி எங்கும் பறவைகள்.

     நீரில் மிதந்தபடி நூற்றுக் கணக்கானப் பறவைகள்.











     நண்பர்களே, கரைவெட்டி ஏரிக்கு, கடந்த பல நூற்றாண்டுகளுக்கும் மேலாக, பல திசைகளில் இருந்தும், பல தூர, தூர தேசங்களில் இருந்தும் பறவைகள் வந்து போய் கொண்டு இருந்தாலும், இப்பகுதியானது, பறவைகளின் சரணாலயமாக, கரைவெட்டி பறவைகள் சரணாலயமாக, அறிவிக்கப் பெற்றது மிக, மிக அண்மையில்தான்.

     ஆம், 1999 ஆம் ஆண்டு, ஏப்ரல் மாதம் 5 ஆம் தேதிதான், இப்பகுதி பறவைகளின் சரணாலயமாக அறிவிக்கப் பட்டது.

     தினமும் நூற்றுக் கணக்கான சுற்றுலாப் பயணிகள் வந்து, பார்த்து, வியந்து போய் கொண்டுதான் இருக்கிறார்கள்.

     கரைவெட்டி ஏரி பறவைகளின் சரணாலயமாக அறிவிக்கப் பெற்று, பதினைந்து ஆண்டுகள் கடந்த பிறகும், அடிப்படை வசதிகள், ஒன்று கூட இல்லாத நிலையே தொடருகிறது.

      இரண்டு அடுக்கு மாடத்தின் பணிகள் கூட முழுமையாக முடியவடையவில்லை.

        இரண்டு அடுக்கு மாடத்தில் ஏறி நின்றோம். கண்பார்வையின் எல்லை வரை பரந்து விரிந்த ஏரிப் பரப்பில் பறவைகள் சிறு சிறு, புள்ளிகளாகத்தான் தெரிந்தன.

        தூரத்தில் இருக்கும் பறவைகளை, அருகாமையில் கண்டு ரசிக்க, ரசித்து மகிழ உதவும், டெல்ஸ்கோப் வசதி இல்லவே இல்லை.



      இப்பொழுதுதான் ஒலி, ஒளி அரங்கம் ஒன்று கட்டி முடிக்கப் பட்டுள்ளது. செயற்கை நீரூற்று, சிறுவர்களுக்கானப் பூங்கா போன்றவை விரைவில் உருவாக்கப்பட உள்ளதாக, அங்கிருந்தோர் தெரிவித்தனர்.

      விரைவில் அடிப்படை வசதிகள் உருவாக்கப் பெற்று, இப்பகுதி புத்துணர்வு பெறுமானால், தஞ்சைக்கு மிக, மிக அருகில் அமைந்திருக்கும், அதி அற்புதமானச் சுற்றுலாத் தலமாய் கரைவெட்டி பறவைகள் சரணாலயம் வளரும், உயரும்.

    


     

68 கருத்துகள்:

  1. Excellent write up MrJayakumar.For a man who has kept his third eye open, vision of the world is different.your writtings prooves that.Keep that eye open so that you can give more and more information to intellectually blind people.Well done.

    பதிலளிநீக்கு
  2. கரைவெட்டி இதுவரை பார்த்ததில்லை. அவசியம் பார்த்துவிடுவேன், அந்த அளவு தங்களின் பதிவு அருமையாக இருந்ததோடு, பார்க்கும் ஆசையைத் தூண்டிவிட்டது.

    பதிலளிநீக்கு
  3. இதுவரை கேள்விப்படாத ஒரு சரணாலயம். அறிமுகப்படுத்தியதற்கு நன்றி! நமது சுற்றுலா தளங்கள் பல அடிப்படை வசதிகள் இல்லாமல்தான் இருக்கிறது. அப்படி ஏற்படுத்தப்பட்ட இடங்களிலும் அவைகள் சரியாக பராமரிக்கப் படுவதில்லை.
    அருமையாக பகிர்ந்தமைக்கு நன்றி!
    த ம 2

    பதிலளிநீக்கு
  4. சிலருக்கு ஊட்டி பிடிக்கும் ,சிலருக்கு கொடைக்கானல் பிடிக்கும் ..பறவைகளும் அப்படித்தான் போலிருக்கிறது ..சில வேடந்தாங்கலுக்கு நாடுகின்றன ,சில கரைவெட்டிக்கும் வருகின்றன போலிருக்கிறது :)
    ஆளும் கட்சி கரைவேட்டிகள் மனது வைத்தால் ,கரைவெட்டி புத்துணர்வு பெறும்:)

    பதிலளிநீக்கு
  5. பதிவை ரசித்தேன்.

    என் கணினி மக்கர் செய்கிறது. எந்தப் பக்கத்தைத் திறந்தாலும் பாலமகி பக்கங்கள் மட்டுமே திறக்கிறது. எங்கள் ப்ளாக்கைத் திறக்க முயற்சித்தாலும் இதே கதை!

    பதிலளிநீக்கு
    பதில்கள்
    1. நன்றி நண்பரே
      கணினி பல நேரங்களில் அதன் விருப்பத்திற்கே இயங்குகிறது
      என்ன செய்வது நண்பரே

      நீக்கு
  6. எங்கள் ஊர் (திருமழபாடி) பக்கம் இந்த ஊர் என்பதால் இந்த ஊரின் ஏரியைப் பற்றி கேள்விப்பட்டு இருக்கிறேன். சென்று பார்த்ததில்லை. அப்போதெல்லாம் இது பறவைகள் சரணாலயம் கிடையாது. உங்கள் பதிவின் வழியே கூடுதல் விவரங்கள் தெரிந்து கொண்டேன்.வாய்ப்பு கிடைக்கும் போது சென்று வர வேண்டும். நன்றி.

    பதிலளிநீக்கு
  7. த.ம. ஓட்டுப்பட்டை இல்லை. மீண்டும் வருகிறேன்.

    பதிலளிநீக்கு
  8. த.ம. ஓட்டுப்பட்டை இல்லை. மீண்டும் வருகிறேன்.

    பதிலளிநீக்கு
  9. கரைவெட்டி - அறிமுகத்திற்கு நன்றி அண்ணா. பார்க்க விரும்பும் இடங்களின் பட்டியலில் சேர்த்துக்கொள்கிறேன். அடிப்படை வசதிகள் விரைவில் செய்யப் பட்டால் நன்றாக இருக்கும்.

    பதிலளிநீக்கு
  10. உங்கள் கனவு நினைவாகட்டும்! வாழ்த்துகள்

    பதிலளிநீக்கு
  11. பறவைகள் சரணாலயத்துக்க்ப் பெயர் கரைஒ வேட்டி ஏதாவது காரணப்பெயராக இருக்குமோ?அடிப்படை வசதிகள் என்றால் தங்குமிடமா உணவு விடுதிகளா இல்லை ஓய்வு எடுக்கும் அறைகளா அதுவும் இல்லை என்றால் இயற்கை உபார்தைகளைக் கழிக்க இடமா. செலவு செய்தால் ரிடர்ன் கிடைக்க வேண்டுமே குறைந்த பட்சம் சரணாலயம் பற்றிய அடிப்படைச் செய்திகளையாவது விளம்பரப் படுத்தலாம் கரை வேட்டிகளுக்கு ஆதாயம் இருக்குமா?

    பதிலளிநீக்கு
    பதில்கள்
    1. ஏரியின் பெயர் கரை வெட்டி ஐயா
      காரணப் பெயராகத்தான் இருக்க வேண்டும்
      எந்த ஒரு அடிப்படை வசதியுமே இல்லை ஐயா
      ஒரு புறம் வயல் வெளி மறுபுறம் ஏரி அவ்வளவுதான்

      நீக்கு
  12. பெயரில்லா15 பிப்ரவரி, 2016

    Felt very much happy
    K Balraj

    பதிலளிநீக்கு
  13. இது வரை இதைக் குறித்துக் கேள்விப் பட்டதில்லை. முடிந்தால் போய்ப் பார்க்க வேண்டும்.

    பதிலளிநீக்கு
    பதில்கள்
    1. வாய்ப்பு கிடைக்கும்பொழுது அவசியம் பாரங்கள் சகோதரியாரே

      நீக்கு
  14. தங்களது நடையில் அழகிய விளக்கம் அருமை நண்பரே பார்க்க வேண்டும் என்ற ஆவல் கொள்கிறது நிச்சயம் சென்று வர முயல்வேன் நன்றி
    தமிழ் மணம் 8

    பதிலளிநீக்கு
  15. அன்புள்ள கரந்தையாரே!

    கரைவெட்டி பறவைகள் சரணாலயம் பற்றி அழகிய படங்களுடன் அருமையாகச் சொல்லியதை அறிந்து மகிழ்ந்தோம்.

    நன்றி.

    த.ம.9

    பதிலளிநீக்கு
  16. இரண்டு சக்கர வாகனத்திலேயே ஒரு நூறுமுறை அது வழியாகப் பயணித்திருப்பேன். மார்ச்சில் போகிறேன்

    பதிலளிநீக்கு
  17. இடத்தினை அறிமுகம் செய்ததுக்கு நன்றி கரந்தை ஜெயகுமார் . சகோ பகவன்ஜி சொன்னது தான் நான் சொல்வதும் .
    //ஆளும் கட்சி கரைவேட்டிகள் மனது வைத்தால் ,கரைவெட்டி புத்துணர்வு பெறும்:)//
    நான் கூட கரைவேட்டி பற்றிதான் எழுதி இருக்கிங்க என்று நினைத்தேன் , ஒரு கிராமம் அதன் பெயர் தான் கரைவெட்டி என பின்னர் தான் படித்து புரிந்து கொண்டேன் யாழ்ப்பாணத்திலும் ஒரு இடம் இருக்கிறது கரவெட்டி என்று சிறிது பெயர் வித்தியாசம் .
    நன்றி

    பதிலளிநீக்கு
  18. இடம் அறிமுகத்துக்கு நன்றி. Zoomல எந்தப் பறவையையும் போட்டோ பிடிக்கலையா? அல்லது கொக்கைத் தவிர வேறு ஏதும் இல்லயா?

    பதிலளிநீக்கு
    பதில்கள்
    1. பல்வேறு பறவைகள்இருந்தன நண்பரே
      ஆனால் என்னிடம் இருந்ததே அலைபேசி காமிரா மட்டும்தான்
      அதனால் சூம் செய்து மற்ற பறவைகளைக் காணவோ, படம் பிடிக்கவோ வாய்ப்பு இல்லாமல் போய்விட்டது
      நன்றி நண்பரே

      நீக்கு
  19. எனது 28 வயதில் விருதுநகர் மாவட்டத்தில் உள்ள கிராமத்தில் வேலை பார்த்தேன்,அந்த ஊரின் கண்மாய்க்கரை பெரியதாக ஒரு ஆலமரம்,அதில் வித விதமான பறவைகள் மழை நேரத்தில் வந்து அடையும்,ரொஉ மழை நாளில் இரவோடு இரவாக அந்த மரம் சாய்ந்து அதில் தங்கியிருந்த பறவைகள் எல்லாம் இறந்து போயின,அரிய இனப்பறவைகளின் இரப்பை ஊரே வந்து மறு நாள் வேடிக்கை பார்த்தது,அது போலான பறவைகளை காப்பாற்ற இந்த அமைப்பு முனைந்திருக்குமானால் இந்நேரம் அந்த ஊர் சிறந்த பறவைகள் சரணாலயம் ஆகிப்போயிருக்கலாம் ஒரு வேளை,அம்மாதிரியான ஒரு வேளைகளை நாம் நிறைய தவற விடுகிறோம்தான்/

    பதிலளிநீக்கு
    பதில்கள்
    1. உண்மைதான் நண்பரே
      பலவற்றை நாம் தவறவிட்டிருக்கிறோம்
      நன்றி நண்பரே

      நீக்கு
  20. நிச்சயம் ஒரு நாள் போகுவேண்டும் அருமையான பகிர்வு ஐயா.

    பதிலளிநீக்கு
  21. நிச்சயம் ஒரு நாள் போகுவேண்டும். நன்றி sir

    பதிலளிநீக்கு
  22. சேர்ந்து பயணித்த உணர்வைக் கொடுத்தன படங்களும் விளக்கமும். அருமை. நன்றி .

    பதிலளிநீக்கு
  23. சேர்ந்து பயணித்த உணர்வைக் கொடுத்தன படங்களும் விளக்கமும். அருமை. நன்றி .

    பதிலளிநீக்கு
  24. தங்களது கரைவெட்டி பறவைகள் சரணாலயம் குறித்த செய்திக்கு நன்றிகள் பல கோடி !
    பறவைகள் சில வற்றை படமெடுத்து பதிவு செய்திருந்தால் இன்னும் செம்மையாய் செழுமையாய் இருந்திருக்கும் !

    பதிலளிநீக்கு
    பதில்கள்
    1. என்னிடம் அலைபேசி மட்டுமே இருந்தது
      இப்படங்கள்எல்லாம் அலைபேசி கேமிராவைப் பயன்படுத்தி
      எடுக்கப்பட்டவை
      எனவே தொலைவில் உள்ள பறவைகளை எடுக்க இயலவில்லை
      நனறி ஐயா

      நீக்கு
  25. பயனுள்ள தகவல்! பகிர்ந்தமைக்கு நன்றி ஐயா!

    பதிலளிநீக்கு
  26. ஆவலுடன் படித்தேன் அறிமுகப்படுத்திய கரைவெட்டியை.

    பதிலளிநீக்கு
  27. நல்ல இடத்தின் அறிமுகம்...உங்களைப்போன்றோர்க்கே அதனைப்பற்றிய அறிமுகப்படுத்தும் வாய்ப்பும் வருகிறது...படங்களும்..பகிதலும் அருமை நண்பரே...

    பதிலளிநீக்கு
  28. கரைவெட்டி பறவைகள் சரணாலயம் ..பார்க்க வேண்டிய இடம்...

    பதிலளிநீக்கு
  29. அரியலூர் திருமானூர் கீழப்பழூர் அருகே பறவைகள் சரணாலயம் இருக்கிறதா?

    நான் பார்த்தது இல்லை.

    அடுத்த முறை வரும்போது பார்க்கவேண்டும்.

    தகவலுக்கு நன்றி.

    சுப்பு தாத்தா.

    பதிலளிநீக்கு
    பதில்கள்
    1. அடுத்த முறைவரும் பொழுது அவசியம் பாருங்கள் ஐயா
      நன்றி

      நீக்கு
  30. நல்ல தகவல்கள்.
    விளக்கங்களிற்கு மிக்க நன்றி.
    (வேதாவின் வலை)

    பதிலளிநீக்கு
  31. கரைவெட்டி உங்கள் எழுத்தில் அழகாய் கண்முன்னே ஐயா...

    பதிலளிநீக்கு
  32. அறிமுகப்படுத்தியதற்கு நன்றி! உங்கள் பணி தொடர்க..

    பதிலளிநீக்கு
  33. புதியதாய் ஒரு சரணாலயம் பற்றி அறிந்து கொண்டோம் நண்பரே! மிக்க நன்றி. நம்மூரில் எந்தச் சுற்றுலாத் தளமும் வசதிகள் மிக்கவையாக இருப்பதில்லை. இருக்கும் வசதிகளும் முழுமையாக இருப்பதில்லை ஒரு சில இடங்களைத் தவிர. தகவல்கள் அருமை!

    பதிலளிநீக்கு
  34. இதுவரை கேள்விப்படாத கரைவெட்டி சரணாலயம் பற்றியறிந்து கொண்டேன். அவசியம் பார்க்க வேண்டும்.

    பதிலளிநீக்கு

அறிவை விரிவு செய், அகண்ட மாக்கு, விசாலப் பார்வையால் விழுங்கு மக்களை, அணைந்து கொள், உன்னைச் சங்கம மாக்கு, மானிட சமுத்திரம் நானென்று கூவு