16 மே 2017

விபுலாநந்தர்





     திருக்கொள்ளம் புதூர்

     தஞ்சாவூர், திருவாரூர் சாலையில், கொரடாசேரியில் இருந்து இடதுபுறம் திரும்பி, கும்பகோணம் சாலையில் பயணித்தால், சிறிது தொலைவிலேயே, குடவாசல் என்னும் சிற்றூர், நம்மை எதிர் கொண்டு வரவேற்கும்.

      குடவாசலைத் தாண்டி, ஒரு சில கிலோ மீட்டர் தொலைவில், இடது புறம் திரும்பிய, சில நிமிடங்களில், கம்பீரமாய் தலை நிமிர்ந்து நிற்கிறது ஒரு திருக்கோயில்.

      திருக்கொள்ளம்புதூர் திருக்கோயில்.

      நற்சாந்துப்பட்டி, கோனூர் சமீன்தார் திரு பெ.ராம.ராமன் அவர்களால், பெரும் பொருட் செலவில், முழுவதுமாய், திருப்பணிச் செய்யப் பெற்று, புது உருவமும், புதுப் பொலியும் பெற்ற திருக்கோயில்.


      பலநூறு ஆண்டுகளுக்கு முன், மறைந்துபோன, மக்கள் மறந்துபோன, ஒரு பழம்பெரும் இசைக் கருவி, மீண்டும் உயிர் பெற்று எழுந்து, தன் நரம்புகளை மீட்டி, மீண்டு எழுந்த இடம்.

    திருக்கொள்ளம் புதூர் திருக்கோயில்.

    மீண்டெழுந்த அந்த இசைக் கருவி

   யாழ்.
____

சோழ நாட்டுச் சோறும், காவிரி நீரும், உடலத்தை மாத்திரமல்ல, உள்ளத்தையும் வளர்க்கின்றன. அவற்றினை விட்டு வர மனம் ஒவ்வவில்லை.

      இவர், இலங்கை, மட்டக்களப்பு, காரைத் தீவில் பிறந்தவர்.

      தமிழ்க் கடலில் வாழ்வெலாம் நீந்தியவர்.

      அண்ணாமலைப் பல்கலைக் கழகத்தின் முதல் தமிழ்ப் பேராசிரியர்.

      கரந்தைத் தமிழ்ச் சங்கத்தின், முதற்றலைவர் தமிழவேள் உமாமகேசுவரனாரின் ஆருயிர் தோழர்.

       1941 ஆம் ஆண்டு, வடநாட்டு யாத்திரை சென்ற உமாமகேசுவரனார், தமிழ்நாடு திரும்பாமலேயே, இயற்கையோடு இணைந்த செய்தியறிந்து துடி துடித்துப்போனவர்.

உற்றாரை யான் வேண்டேன், ஊருடன் பேர் வேண்டேன்
எனக் கூறுதற்கு உரிய நிலையினை, ஆண்டவன் அருளினால், ஓரளவிற்கு எய்தினேன் ஆயினும்,
கற்றாரை யான் வேண்டேன், கற்பனவும் இனியமையும்
எனக் கூறும் உள்ளத் துணிவினை யான் எய்தவில்லை.

      செந்தமிழ்ப் புரவலரும், தமிழவேளும், கண் போல் நண்பருமாகிய உமாமகேசுவரனாரது, பொன்னுடலம், திருவயோத்தி நகரிலே, சரயு நதிக்கரையிலே, தீக்கு இரையாயிற்று என்னுஞ் செய்தி, துயரின்மேற் றுயராயிற்று.

       தமிழவேளின் பிரிவினால் துயர் உற்றவருக்கு, அவரின் அன்பு வேண்டுகோள் நினைவிற்கு வந்தது.

       வேண்டுகோளினை நிறைவேற்ற முடிவு செய்தார்.

       கரந்தைத் தமிழ்ச் சங்கத்திற்கு வந்து, சங்கத்திலேயே தங்கி, தன் இசை ஆராய்ச்சியின் முடிவுகளை எல்லாம், ஏட்டில் இறக்கி வைத்தார்.

      

       யாழ்

     தமிழிசையின் அடையாளம்.

     நமது தேசிய இசைச் சின்னம்

     நான்கு நிலத்திற்கும் கருப்பொருள் கூறிய தொல்காப்பியர், நிலத்திற்கு ஒரு பண்ணிசைக் கருவியாக யாழையேக் குறிப்பிடுகிறார்.

     தொல்காப்பியத்திலும், பாட்டிலும், தொகையிலும், காப்பியங்களிலும், பன்னார் தேவாரங்களிலும், ஆழ்வார்கள் அருளியவையிலும் பெரிதும் போற்றப்பட்ட யாழ், என்னவாயிற்று?

      அதற்கு விடைகளைத் தேடினார்.

      பன்னெடுங்காலம் தான் கற்ற தமிழ், வடமொழி, ஆங்கிலம், கணிதம், இயற்பியல் துணை கொண்டு, பல காலம் ஆய்ந்து, கரந்தைத் தமிழ்ச் சங்கத்தில் அமர்ந்து, பெரு நூல் ஒன்றை வெளிக் கொணந்தார்.

      யாழ் நூல்
    
     இசைத் தமிழ் இலக்கண நூல்.

     பலநூறு ஆண்டுகளாக மறைந்து கிடந்த, பழந்தமிழிசைப் பரப்பின் எல்லையை உணர்த்தும் நூல்.

     இசைத் தமிழ், இயற்றமிழ், விஞ்ஞானம், கணிதம் ஆகிய அறிவுத் துறைகளையெல்லாம் கலந்து, குழைத்து எழுந்த தமிழமுதம், இசையமுதம்.

என்னை இப்பணியில் பெரிதும் ஊக்கிய, கரந்தைத் தமிழ்ச் சங்கத் தலைவர் தமிழவேள் உமாமகேசுவரம் பிள்ளையவர்கள், இதன் நிறைவுப் பேற்றினைக் காணுமுன், பிரிந்து சென்றமையினை நினைக்கும்போது, என்னுள்ளம் பெரிதும் துயருறுகிறது.

அவர்களது அன்புக்குரிய நிலையமாகிய, இத்தமிழ்ப் பெருமன்றத்திலும், இதனைச் சார்ந்திருக்கும் அகத்தியர் திருமடத்திலும் இருந்து, இந்நூலினை எழுதி முடித்தமை, அவர்களது பிரிவினாலெய்திய மனத்துயரினை ஓரளவிற்கு நீக்கி விட்டது.


யாழ் நூல்

ஆங்கில மொழிப் புலமையாலே, தமிழைப் புதுமுறையில் வளம் படுத்திய
கணித மேதை
நாவலர்


விபுலாநந்த அடிகளார் அவர்களின்
இசைத் தமிழ் இலக்கண நூல்.

யாழ் நூல்.

    மாபெரும் பணியினை அயராது, தளராது செய்து, இருபத்து நான்கு மணி நேரமும், இதே நினைவில் மூழ்கி, உலகு மறந்து, தன் உடல் நிலை மறந்து, பணியாற்றியதால், சுவாமிகளின் உடல் தளர்வுற்று, பிணியின் பிடியில் வீழ்ந்தது.

       யாழ் நூலின் முதற் பதிப்பினைத் தன் சொந்த, பொருட் செலவில், வெளியிட்டு உதவ, உறுதி பூண்டிருந்த


நற்சாந்துப்பட்டி
திரு ராம. சிதம்பரஞ் செட்டியார் அவர்கள்
நோய் நீங்க, நாங்கள் என்ன செய்ய வேண்டும் என விபுலாநந்தரை வினவினார்.

யாழ் நூழை அரங்கேற்றுதலே என் உள்ளத்திற்குப் பெரும் ஆறுதலைத் தரும்.

      யாழ் நூல் அச்சுப் பணி தொடங்கியபோதே, இரண்டாம் உலகப் போரும் தொடங்கியது.

       அச்சிடத் தாளுக்குத் தட்டுப்பாடு வந்தது.

       அச்சுப் பணி, ஓராண்டு, ஈராண்டல்ல, நான்காண்டுகள் தடைபட்டு நின்றது.

       போர் முடிவுற்றபின் தொடர்ந்தது.


திருக்கொள்ளம் புதூர் திருக்கோயில்
ஆளுடைய பிள்ளையார் திருமுன்
5.6.1947 இல்
யாழ் நூல்
அரங்கேற்றம் கண்டது.

      யாழ் நூல் அரங்கேற்றத்திற்காகவே, தன் உயிரினைக் கையில் பிடித்து வைத்துக் கொண்டு, காத்திருந்தார் போல, நூல் அரங்கேறிய 44ஆம் நாளே, விபுலாநந்த அடிகளார் இயற்கையோடு இணைந்தார்.

திருக்கொள்ளம்புதூர் திருக்கோயில்.

------
  
     



 பலநூறு வருடங்களுக்குப் பின், யாழ் மீண்டும், தன் இன்னிசையைப் பரப்பிய, திருக்கொள்ளம்புதூர் கோயிலில் நின்று கொண்டிருக்கிறேன்.

     ஆளுடைய பிள்ளையாரின் முன் அமைதியாய் நிற்கின்றேன்.

     சுவாமி விபுலாநந்தர், பத்துப் பாடல்களை, தன் நலிவுற்ற உடல் நிலையினையும் பொருட்படுத்தாது, பாடிப் பரவசப் பட்ட இடத்தில் வாய் மூடி அமைதியாய் நிற்கின்றேன்,.

      யாழின் இசை மெல்ல மெல்ல மேலெழுந்து, கோயில் சுவற்றில் மோதி எதிரொலித்து, வின்னையும், மண்னையும், மனிதர்களையும், தன் அற்புத இசையால், இன்னிசையால், கிளர்ந்தெழச் செய்து, மெய்சிலிர்க்க வைத்த இடத்தில், மௌனியாய் வாய் மூடி நிற்கின்றேன்.

      என் செவிகள் மெல்ல மெல்ல, மிருதுவாய், ஒரு அதிர்வினை உணரத் தொடங்கின.

      யாழின் இன்னிசை, இன்றும், இக்கோயிலினுள், எதிரொலித்துக் கொண்டே இருப்பதைப் போன்ற ஒரு உணர்வு.

       பல்லாண்டு கால கனவு, இன்று நிறைவேறி இருக்கிறது.

        உடலெங்கும் ஒரு சிலிர்ப்பு.

        என்னை இங்கு அழைத்து வந்த அந்த உன்னத மனிதரைத் தேடுகிறேன்.

        அதோ, அங்கே நின்று கொண்டிருக்கிறார்.

        புகைப்படக் கருவியின் மூலம், திருக்கொள்ளம்புதூர் கோயிலையே விழுங்கிக் கொண்டிருக்கிறார்.


முனைவர் மு.இளங்கோவன்

      இடைக்கட்டு என்னும் சிற்றூரில் பிறந்து, புதுச்சேரியில் புகுந்து, உலகெங்கும் பறந்து, நாம் மறந்து போனத் தமிழறிஞர்களை, கால ஓட்டத்தில் கரைந்து போன, ஆவணங்களை, எல்லாம் மீண்டும் எழுந்து உலகை வலம் வரச் செய்யும் ஆற்றலாளர்.

      தன் குடும்பம் மறந்து, சுற்றம் துறந்து, ஈட்டிய செல்வம் இழந்து, ஆவணப் படம் எழுத்து, பழந்தமிழர் இசையினை, இசை விற்பன்னர்களை, உலகு முழுவதும் உலாவ விடும் வித்தகர்.

பண்ணாராய்ச்சி வித்தகர்
குடந்தை சுந்தரேசனாரை
ஆவணப் படம் எடுத்து
அகிலம் முழுதும் பரவ விட்டவர்.


இன்று
சுவாமி விபுலாநந்தரின்
இசைப் பயணத்தை, வாழ்வியலை
குறுந் தகடுகளில், முற்றாய் பதிய வைத்து
இப்புவி எங்கனும்,
தமிழ் வித்தாய் விதைக்க
தமிழ் இசையைப் பரப்ப
பெரு முயற்சி எடுத்து வருகிறார்.

           கடந்த 24.12.2016 சனிக்கிழமை மாலை, இதோ, முனைவர் மு,இளங்கோவன் அவர்களுடன், யாழ் நூல் அரங்கேறிய, புண்ணிய பூமியில் நின்று கொண்டிருக்கிறேன்.

       



விபுலாநந்தர் பல மாதங்கள் தங்கி, யாழ்நூலை, யாத்த, கரந்தைத் தமிழ்ச் சங்கத் தமிழ்ப் பெருமன்றத்தை, சங்க நுழைவு வாயிலை, காலை ஒளியில் படமாக்கினார்.






சங்க இலக்கியங்கள் முழுவதையும், தன் நா நுனியில், எப்போதும் போற்றிப் பாதுகாக்கும், சங்க இலக்கியக் கடல்
புலவர் இரா.கலியபெருமாள் அவர்களுடன்
ஒரு நேர்முகம்.

     கவிஞர், எழுத்தாளர். பேராசிரியர், நாவலாசிரியர் ஹரணி, உமாமகேசுவர மேனிலைப் பள்ளித் தலைமையாசிரியர் நண்பர் திரு வெ.சரவணன் அவர்களோடு இணைந்து, புலவர் ஐயாவின் நேர் முகத்தை, அலைகடலென ஆர்ப்பரித்து வெளிப்பட்ட, சங்க இலக்கியப் பாடல்களை, கேட்டு நெகிழ்ந்து போய் நின்றேன்.

    


 மாலையில், திருக்கொள்ளம்புதூர் கோயிலில் இதோ, தன்னிலை மறந்து நிற்கின்றேன்.

முனைவர் மு.இளங்கோவன் அவர்களுக்குத்தான்
நன்றி சொல்ல வேண்டும்.
யாழ் நூல்
அரங்கேறிய
புண்ணிய பூமிக்கு
என்னையும் அழைத்து வந்ததற்காக.

ஏழிரண் டாண்டுகள் இடர்பல துய்த்தும்
ஏழிசை யாழின் இயற்றிறம் யாவும்
நுண்ணிதின் ஆய்ந்து நுவல்திப் பெருநூல்
நண்ணுமிம் முயற்சியில் நான்படு துயரம்
எண்ணினும் உடலுளம் எல்லாம் நடுக்குறூஉம்
ஆயிரம் ஆண்டுகள் அறியா வகையில்
வீயுறும் நிலையில் வீழ்ந்து கிடந்த
நற்றமிழ் யாழும் சொற்றமிழ் இசையும்
தெற்றென விளங்கும் திருவிளக்(கு) இந்நூல்
செந்தமிழ்க் கிஃதோர் சீர்சால் பொற்பணி

விபுலாநந்தர் அவணப்படம்
மெல்ல மெல்ல மெருகேறிக் கொண்டிருக்கிறது.

       முனைவரோ ஊர் ஊராய் சுற்றிக் கொண்டிருக்கிறார். அறிஞர்களை, வயது முதிர்ந்த தமிழறிஞர்களை எல்லாம், தேடித் தேடிக் கண்டுபிடித்து, ஆவணப் படத்திற்கு உயிர் கொடுத்துக் கொண்டிருக்கிறார்.

        வெள்ளை நிற மல்லிகையோ என்னும் விபுலாநந்தரின் பாடலுக்கு, உயிர் கொடுத்து, உரு கொடுத்து, காணொளியாய் காற்றில் மிதக்க விட்டவர், விரைவில், முழுப் படத்தினையும், இவ்வுலகு வியந்து போற்ற, வெளியிட இருக்கிறார்.

முனைவர் மு,இளங்கோவன் அவர்களின்
எண்ணம் பெரிது
எழுச்சி பெரிது
முயற்சி பெரிது
ஆற்றல் பெரிது
உழைப்பு பெரிது

பெரிதினும் பெரிதாய்
இவ்வுலகு உள்ளவரை
நிலைத்து நிற்க
சுவாமி விபுலாநந்தரை
உருவாக்கி வருகிறார்
பார்த்துப் பார்த்துச் செதுக்கி வருகிறார்.


முனைவர் மு.இளங்கோவன் அவர்களை
வாழ்த்துவோம்  போற்றுவோம்.

       




34 கருத்துகள்:

  1. வியப்புக்குறிய மாமனிதர் திரு. முனைவர் மு. இளங்கோவன் அவர்களை போற்றுவோம்.

    பதிலளிநீக்கு

  2. இந்தச் செய்யற்கரிய செயலினை
    ஊக்கத்துடன் செய்கிற முனைவர்
    இளங்கோவனர் அவர்களை அருமையாக
    நாங்களும் அறிந்து பெருமிதம்
    கொள்ளும்படியாய் மிகச் சிறப்பாக
    அறிமுகம் செய்த தங்களுக்கு
    மனமார்ந்த நல்வாழ்த்துக்கள்

    பதிலளிநீக்கு
  3. பழந்தமிழிசை குறித்து ஆய்வுக்காகத் தன் வாழ்வை அர்பணித்த மாமனிதர் சுவாமி விபுலாநந்தர் வரலாற்றை ஆவணப்படுத்தும் முனைவர் மு. இளங்கோவன் அவர்களுக்கு நல்வாழ்த்துக்கள்.

    நல்ல பகிர்வு. சிறந்த மனிதர்கள் வாழ்ந்த இடங்களுக்குப் பயணிப்பது கடவுளின் ஆசிர்வாதம்.

    பதிலளிநீக்கு
  4. அருமை... அருமை ஐயா...

    உங்கள் வாழ்வில் மறக்க முடியாத நிகழ்வுகளில் இதுவும் ஒன்று...

    பதிலளிநீக்கு
  5. முனைவர் மு.இளங்கோவன் அவர்களை
    வாழ்த்துவோம் போற்றுவோம்.

    பதிலளிநீக்கு
  6. முனைவர் மு. இளங்கோவன் அவர்களுக்கு வாழ்த்துக்கள்.
    அழகான் படங்கள் நிகழ்வை நேரில் கண்ட அனுபவம் தந்தது.
    நன்றி.

    பதிலளிநீக்கு



  7. நிறையக் கொடுத்து வைத்திருக்கிறீர்கள் சகோ. உங்கள் எண்ணமே உங்களை எல்லா சிறப்பிடங்களிலும் கொண்டு சேர்க்கிறது. வாழ்த்துகள் உங்களுக்கும், இளங்கோ அவர்களுக்கும் புலவர் கலியபெருமாள், ஹரணி, சரவணன் ஆகியோருக்கும்.

    பதிலளிநீக்கு
  8. விபுலானந்தர் பற்றி இன்றைய தலைமுறை அறியும் வண்ணம் ஆவணப்படுத்தும் முயற்சியில் ஈடுபட்டுள்ள அனைவருக்கும் வாழ்த்துக்கள். இந்தத்தகவலை எங்களுக்குத் தெரிவித்தமைக்காக உங்களுக்கும் வாழ்த்துக்கள்.

    இராய செல்லப்பா நியூஜெர்சி (மிக விரைவில் சென்னை)

    பதிலளிநீக்கு
  9. அறியாத தகவலை அறியத் தந்தமைக்கு நன்றி.

    பதிலளிநீக்கு
  10. அறிந்து கொண்டேன். முனைவர் இளங்கோவன் அவர்களுக்குப் பாராட்டுகள்.

    தம +1

    பதிலளிநீக்கு
  11. சிறப்பான அறிமுகம் அறிந்து கொண்டேன். நன்றி!!

    பதிலளிநீக்கு
  12. சிறப்பான அறிமுகம் அறிந்து கொண்டேன். நன்றி!!

    பதிலளிநீக்கு
  13. அருமை . முனைவர் இளங்கோவன் அவர்கட்கு நன்றி கலந்த வாழ்த்துக்கள்

    பதிலளிநீக்கு
  14. மிக மிக அருமையான பதிவு நண்பரே! ஏற்கனவே கொஞ்சம் தெரிந்திருந்தாலும் புதியதாய் நிறைய தெரிந்துகொண்டோம். மிக்க நன்றி

    பதிலளிநீக்கு
  15. முனைவர் இளங்கோவன் அவர்களுக்கும் எங்கள் பாராட்டுகள் வாழ்த்துகள்!

    பதிலளிநீக்கு
  16. முனைவர் இளங்கோவனுக்குப் பாராட்டுகள் யாழ் என்றால் வீணை என்று நினைத்துக் கொண்டிருந்தேன் படத்தில் இருக்கும் கருவி வித்தியாசமாய் இருக்கிறதே

    பதிலளிநீக்கு
  17. அரிய பணி மேற்கொண்டுவரும் முனைவர் இளங்கோவன் அவர்களுடைய முயற்சி பாராட்டத்தக்கது. அவரைப் பற்றிய தங்களின் பதிவு அவரது இடையறா உழைப்பை அருமையாக எடுத்துரைத்தது. நன்றி.

    பதிலளிநீக்கு
  18. என் இனிய நண்பர் ஜெயக்குமார் அவர்களுக்கு,
    இசை இலக்கணம் கூறும் ‘யாழ் நூல்” எழுதிய மாமனிதர் விபுலானந்தர் அவர்களின் உழைப்பினை எடுத்துக் கூறிய விதத்திலும் அந்நூல் எழுத அவருக்கு தூண்டுகோலாக விளங்கிய கரந்தைத் தமிழ்ச்சங்கத்தின் முதல் தலைவர் தமிழவேள் உமாமகேசுவரம் பிள்ளை அவர்களின் செயலைக் குறிப்பிட்ட விதத்திலும் அந்த நூலினைப் பற்றியும் விபுலானந்தர் பற்றியும் தன் பொருளையும் உடல் மற்றும் உள்ள உழைப்பினையும் நல்கி ஆவணப்படத்தினை எடுத்து வரும் முனைவர் மு.இளங்கோவன் அவர்களைப் பற்றி பதிவிட்ட முறையிலும் தங்களின் பதிவு அபாரமாக உள்ளது.

    பதிலளிநீக்கு
  19. நல்ல முயற்சி. பகிர்வுக்கு நன்றி!

    பதிலளிநீக்கு
  20. முனைவர் மு.இளங்கோவன் அவர்களின்
    பணியைப் போற்றுவோம். - அவர்களைப்
    பாராட்டுவோம்.

    பதிலளிநீக்கு
  21. முனைவரின் செயலுக்கு பாராட்டுக்கள் விபுலானந்தரின் யாழ்நூல் இன்னும் பலதலைமுறைக்குச் செல்லவேண்டிய ஒரு அரிய பொக்கிஷம்!

    பதிலளிநீக்கு
  22. பகிர்வில் ஒரு சிறுதவறு ஐயா விபுலானந்தர் பிறந்தது இலங்கையின் கிழக்குமாகாணம் மட்டக்களப்பில் இருக்கும் காரைதீவு என்ற ஊரில்! யாழ்ப்பாணம் காரைதீவில் அல்ல என்பதே சரியான தகவல் ஐயா! தங்களின் சீரிய பதிவில் குறை இருக்கக்கூடாது என்ற ஆதங்கத்தில் தான் இதனை குறிப்பிடுகின்றேன் கரந்தை ஐயா!

    பதிலளிநீக்கு
    பதில்கள்
    1. திருத்தம் செய்துவிட்டேன் நண்பரே
      சுட்டிக் காட்டியமைக்கு மனமார்ந்த நன்றியினைத்தெரிவித்து மகிழ்கின்றேன்

      நீக்கு
  23. விபுலானந்தர் இன்னொரு நூல் வெளியீடு செய்தார் அது கங்கையில் விடுத்த ஓலை என்பது கரந்தை நண்பரின் மரணம் அவரை அதிக மனவேதனையை கொடுத்த படியால் அவருக்கு சமர்ப்பித்த கங்கையில் விடுத்த ஓலையில் தன்நட்பின் பெருமைகளை பாராட்டி ,சீராட்டி, தன் நட்பு தன்னைவிட முன் சென்ற விண்ணுலகம் பற்றி எல்லாம் பாடியது வரலாறு சிவனின் பாதத்தில் செல்லவேண்டும் என்றே கங்கையில் விடுத்த ஓலையில் குறிப்பிட்டு இருக்கின்றார் அன்நூல் இன்னும் இலங்கையில் பட்டப்படிப்பு துணையாக இருக்கின்றது ஐயா! ஒரு தகவலுக்கு மட்டுமே இது!

    பதிலளிநீக்கு
    பதில்கள்
    1. வாய்ப்பு கிடைக்குமாயின் கங்கையில் விடுத்த ஓலை நூலின் பி.டி.எஃப்., கிடைக்குமாயின் அனுப்பி உதவுங்கள் நண்பரே
      நன்றி

      நீக்கு
    2. எனது மின்னஞ்சல் முகவரி
      karanthaikj@gmail.com

      நீக்கு
  24. பயணியுங்கள் சகோ..
    வாழ்த்துகள் ..
    அறிமுகத்திற்கு

    பதிலளிநீக்கு
  25. ' உற்றாரை யான் வேண்டேன், ஊருடன் பேர் வேண்டேன்
    எனக் கூறுதற்கு உரிய நிலையினை, ஆண்டவன் அருளினால், ஓரளவிற்கு எய்தினேன் ஆயினும்,
    கற்றாரை யான் வேண்டேன், கற்பனவும் இனியமையும்
    எனக் கூறும் உள்ளத் துணிவினை யான் எய்தவில்லை."

    ரசித்துப்படித்தேன். மிகவும் அருமை!

    எத்தனை அருமையான தகவல்கள்! விபுலானந்தர் தன் ஆருயிர்த்தோழருக்காக, நட்பிற்காக எடுத்துக்கொண்ட அருமையான உழைப்பு, மறைந்து, மறந்து போன தமிழரறிஞர்களை இந்த உலகிற்கு தன் சீரிய முயற்சியால் மீண்டும் எழுந்து வரச்செய்து வரும் முனைவர் இளங்கோவனின் தமிழ்த்தேடல்கள் அனைத்தையும் வழக்கம்போல் உங்களின் அழகிய தமிழால் அவர்களுக்கு மகுடம் சூட்டியிருக்கிறீர்கள்! தமிழுக்கும் தமிழறிஞர்களுக்கும் தொடர்ந்து உழைத்து வெளியுலகிற்கு வெளிச்சம் காட்டி வருவதற்கு உங்களுக்குத்தான் மனமார்ந்த நன்றி சொல்ல வேண்டும்! மனமார்ந்த வாழ்த்துக்கள், பாராட்டுக்கள்!!

    பதிலளிநீக்கு
  26. விபுலானந்த அடிகளார் பற்றியும்,முனைவர் இளங்கோவன் பற்றியும் யாழ் ப்ற்றியும் சிறப்பான் தகவல்க்ள்.
    நன்றி

    பதிலளிநீக்கு
  27. நல்லதொரு முயற்சி ,அயராமல் செய்யும் முனைவருக்கும்,தங்களுக்கும் வாழ்த்துகள் !ஏற்கனவே ஒரு பதிவு படித்தது நினைவுக்கு வருகிறது :)

    பதிலளிநீக்கு
  28. வணக்கம் கரந்தை மைந்தரே !

    சிறப்பான ஒரு தேடலும் முனைவர் இளங்கோவனின் ஆற்றலும் கண்டு வியந்து நிற்கிறேன் ! வாழ்த்துகள் !

    தம +1

    பதிலளிநீக்கு
  29. அன்புள்ள ஜெயக்குமார்..

    வணக்கம். உங்களின் இந்தப்பதிவு மிகத் தேவையான வரலாற்றுப்பதிவு. என் இளவல் முனைவர் மு.இளங்கோவனின் பணிகள் தமிழுக்கு மணிமகுடமானவை. அவர் செல்லவேண்டிய உயரமும் நாம் உயர்த்தவேண்டிய உயரமும் கடமையாக முன் நிற்கின்றன. மு.இளங்கோவன் இன்னும் இன்னும் உயர்வார். மகிழ்ந்து வாழ்த்துவோம். இயலுகையில் அவரின் பணிகளுக்குக் கடுகளவேனும் உதவி நிற்போம்.

    பதிலளிநீக்கு
  30. பதிவிற்கு அன்புடன் வாழ்த்துகள்
    எனது இரண்டாவது வலையில்தான்
    ஆக்கங்கள் போடுகிறேன்.
    இங்கு வாருங்கள்:- https://kovaikkothai.wordpress.com/

    பதிலளிநீக்கு

அறிவை விரிவு செய், அகண்ட மாக்கு, விசாலப் பார்வையால் விழுங்கு மக்களை, அணைந்து கொள், உன்னைச் சங்கம மாக்கு, மானிட சமுத்திரம் நானென்று கூவு