12 மார்ச் 2016

கடவுள் கைவிட்டார்


இருப்பதுபொய் போவதுமெய் என்றுஎண்ணி நெஞ்சே
ஒருத்தருக்கும் தீங்கினைஉன் னாதே – பருத்ததொந்தி
நம்மதுஎன்று நாம்இருப்ப நாய்நரிகள் பேய்கழுகு
தம்மதுஎன்று தாம் இருக்கும் தான்.

என்று பாடுவாரே ஒரு சித்தர் நினைவிருக்கிறதா. இச்சித்தர் இப்புவியில் இறுதியாய் நடமாடிய மண்ணில், கடற்கரை மணலில், கடந்த 4.3.2016 வெள்ளிக் கிழமை, பிற்பகல் 11.00 மணியளவில், நானும் கால் பதித்தேன்.

     சித்தர் இறுதியாய் சுவாசித்த, இக்கடற்கரைக் காற்றை நானும் மெல்ல மெல்ல சுவாசித்தேன்.


   பத்து நூற்றாண்டுகளுக்கு முன், அதாவது ஆயிரம் ஆண்டுகளுக்கு முன்னர், இச்சித்தர் இறுதியாய் கால் பதித்த இடத்திற்கு அருகில் உள்ள, மடத்தில், வேதனையோடு அமர்ந்திருந்த வேளையில், அருகிருந்த ஒருவர் கூறினார், அருகில்தான் சித்தர் சமாதியான இடம் இருக்கிறது.

      மெல்ல எழுந்து மெதுவாய் நடந்து வெளியே வந்தேன். தஞ்சையில் இருந்து நாங்கள் வந்த வாடகைக் கார் காத்திருந்தது.

     அடுத்த ஐந்தாவது நிமிடத்தில், கடற்கரை மணலில் கால் பதித்தேன்.

     அமைதியான சூழல். ஆனாலும் மனதில் மகிழ்ச்சி இல்லை .வெறுமையான மனதுடன் சுற்றிப் பார்த்தேன்.

முன்னை இட்டதீ முப்பு ரத்திலே
பின்னை இட்டதீ தென்இ லங்கையிலே
அன்னை இட்டதீ அடிவ யிற்றிலே
யானும் இட்டதீ மூள்க மூள்கவே

என்று தன் அன்னைக்குத் தீ மூட்டிப் பாடினார் அல்லவா, ஒரு சித்தர், அவர்தம் இறுதி நாட்களை, இறுதி நிமிடங்களைக் கழித்த இடத்தில் அமைதியாய் நின்றேன்.

   

அச் சித்தர் பட்டினத்தார்.

    இடம். சென்னை, திருவொற்றியூர்.

---

    எங்களது வீட்டிற்கு அடுத்த வீட்டில் வசிப்பவர்கள் திரு அழகப்பன், சீதாலட்சுமி தம்பதியினர்.

    இவர்களுக்கு இரு பெண்கள். இருவருமே திருமணமாகி, தற்பொழுது சென்னையில் வசித்து வருகிறார்கள்.

    அழகப்பன் சீதாலட்சுமி தம்பதியினர், தெய்வ வழிபாட்டினைத் தம் அன்றாடப் பணிகளுள் ஒன்றாகவே கருதி, பின்பற்றி வருபவர்கள்.

    காசிக்குச் செல்ல வேண்டும், கங்கையில் மூழ்கி எழ வேண்டும், காசி விசுவநாதரை நெக்குருக வணங்க வேண்டும் என்பதில் தீரா ஆர்வமுடையவர்கள்.

   கடந்த இரண்டு ஆண்டுகளாகக் காசிக்குச் சென்று வந்தார்கள். இவ்வாண்டும் சென்றே ஆக வேண்டும் என்ற பெரு விருப்பம் இருவருக்கும்.

     உறவினர் பலருடன் இணைந்து, சென்னையில் இருந்து, தொடர் வண்டி மூலம், காசிக்குப் புறப்பட்டும் விட்டார்கள்.

     பயணம் தொடங்கிய சில மணி நேரங்களில், திரு அழகப்பன் அவர்களின் துணைவியார் திருமதி சீதாலட்சுமி அவர்களுக்கு லேசான காய்ச்சல். பின் மெதுவாய் ஒரு நடுக்கம். பயணத்தைத் தொடர முடியாத நிலை.

     ஹைதராபாத் தொடர் வண்டி நியைத்தில் இறங்கி, வண்டி மாறிப் பயணித்து, மீண்டும் சென்னைக்கே வந்து சேர்ந்தார்கள்.

     சென்னையின் புகழ் பெற்ற மருத்துவமனைகளுள் ஒன்றில், திருமதி சீதாலட்சுமி அவர்கள் சேர்க்கப் பட்டார். பல இலட்சங்கள், படு வேகமாய் கரைந்தன.

திருமதி சீதாலட்சுமி
இரண்டே நாள். வெள்ளைத் துணியால் முகம் தவிர, உடல் முழுவதையும் மூடி, இறுகக் கட்டி, குளிர் சாதனப் பெட்டியில் வைத்து, பத்திரமாய் திருப்பிக் கொடுத்து விட்டனர்.

     வெற்றுக் காய்ச்சலுக்காக, நடந்து சென்று மருத்துவ மனையில் சேர்ந்தவர், கண்மூடி, கண்ணாடிப் பெட்டியுடன் திரும்பி வந்திருக்கிறார்.

     சாகிற வயதா என்ன?
 
     அல்லது வந்ததுதான் உயிர் கொல்லி நோயா என்ன?

     காசிக்குச் சென்றவரைக் கடவுளும் காப்பாற்றவில்லை, பணம், பணம் என்று கேட்டுக் கேட்டு வாங்கி, கல்லாவை நிரப்பிக் கொண்ட மருத்துவக் கடவுளர்களும் காப்பாற்றவில்லை.

      அதிர்ந்துதான் போய்விட்டோம்.

      என் மனைவி, எதிர்வீட்டு திரு சுந்தரராசன் அவர்களின் துணைவியார் மற்றும் இந்த திருமதி சீதாலட்சுமி மூவரும் நெருங்கிய தோழிகள்.

     தினமும் மாலை நேரத்தில், மூவரும் ஒன்றாய் அமர்ந்து, மணிக் கணக்கில் பேசிப் பேசி மகிழ்வர். எங்கு சென்றாலும் மூவருமாய் இணைந்தே செல்வர்.

      திருமதி சீதாலட்சுமி மறைந்தார்.

      செய்தி அறிந்து திகைத்துத்தான் போனோம்.

---
     கடந்த 3.3.2016 வியாழன் இரவு 8.00 மணி அளவில் செய்தி அறிந்தோம்.

     இரவு 11.00 மணி அளவில் வாடகைக் காரில் சென்னைக்குப் புறப்பட்டோம்.

    நான், எனது மனைவி, அருகாமை வீட்டைச் சார்ந்த நண்பர் திரு இராபர்ட், எதிர் வீட்டு நண்பர் திரு சுந்தரராசன் மற்றும் அவரது மனைவி, எங்கள் தெருவினைச் சார்ந்த நண்பர் திரு கண்ணன் அவர்களின் தாயார், மற்றும் திரு அழகப்பன் அவர்களின் உறவினர் ஒருவர் என எழுவர் புறப்பட்டோம்.

     அதிகாலை 5.00 மணியளவில், சென்னை வளசர வாக்கத்தை அடைந்தோம். நண்பர் திரு அனந்தராமன் அவர்களின் இல்லத்தில், சிறிது ஓய்வு எடுத்தோம்.

     
காலை 9.00 மணி அளவில், திருவொற்றியூர், காளி அம்மன் கோயில் தெருவில் அமைந்துள்ள, திருவொற்றியூர் நகர மடம் சென்றோம்.

      அழகப்பன் சீதாலட்சுமி தம்பதியினர், நகரத்தார் சமூகத்தைச் சார்ந்தவர்கள்.

      இச்சமூகத்தைச் சார்ந்தவர்களுக்கான மடம் இது. இம் மடம் 1859 ஆம் ஆண்டு கட்டப் பெற்றதாகும்.

      சித்தர்களுள் ஒருவரான பட்டினத்தார் செட்டியார் சமூகத்தைச் சார்ந்தவராகவே அறியப் படுகிறார். தஞ்சை மாவட்டம், திருவிடைமருதூரைச் சார்ந்த சிவனேசச் செட்டியார், ஞானக்கலை தம்பதியினரின் மகனாய் பிறந்தவர் இந்தப் பட்டினத்தார். இப்பட்டினத்தார் தன் வாழ்வினைத் துறந்தது, இந்தத் திருவொற்றியூரில்தான்.


     
பட்டினத்தார் பழைய கோயில்
பட்டினத்தார் புதுக் கோயில்

எனவே, பட்டினத்தார் வாழ்வினைத் துறந்த இடத்தில், தங்கள் சமூகத்தைச் சார்ந்தவர்களின் இறுதிச் சடங்கினைச் செய்வதைப் பெரும் புண்ணியமாக இவர்கள் போற்றுகின்றர்.

      நகரத்தார் சமூகத்தைச் சார்ந்தவர்களின் இறுதி யாத்திரைக்காகவே, உருவாக்கப் பட்ட மடம்தான் இந்த திருவொற்றியூர் நகர மடம்.

      மடத்திற்குள் நுழைந்தோம். எதிரில் திரு அழகப்பன் அவர்கள். ஆறுதல் கூற வார்த்தைகள் யாரிடமும் இல்லை.

      கலங்கிய கண்களுடன் கரம் பற்றி அருகில் அமர்ந்தோம்.

     திரு அழகப்பன் மெல்லப் பேசத் தொடங்கினார். தன் மனைவியின் திடீர் மறைவு குறித்து, மெல்லப் பேசத் தொடங்கினார்.

    மருத்துவ மனையில் சேர்த்த பிறகு, இரவு முழுவதும் கடும் வயிற்றுப் போக்கு ஏற்பட்டுள்ளது. உடலின் நீர் சக்தி முழுவதும், முழுமையாய் வெளியேறி இருக்கிறது.

      வயிற்றுப் போக்கினால் ஏற்படும், நீர் இழப்பினைத் தடுக்க, ஈடு செய்ய, நரம்பு வழியாக, பல பாட்டில்கள், நீர்க் கரைசலை மருந்துடன் செலுத்துவார்கள் அல்லவா. இந்த மருத்துவ முறை, இம்மருத்துவ மனையில் பின்பற்றப் படவே இல்லை என்றார்.

     மறு நாள் உடல் உறுப்புகள் ஒவ்வொன்றாக செயழிலக்கத் தொடங்கி இருக்கின்றன.

     திருமதி சீதாலட்சுமி அவர்கள் சிறு, சிறு உடல் உபாதைகளுக்காக, நாட்டு மருந்தை, தமிழ் மருத்துவ முறையிலான மருத்துவத்தைப் பின் பற்றி வந்தவர். எனவே ஆங்கில மருந்து வேலை செய்யவில்லை என ஒருவர் கூறியதாகவும் தெரிவித்தார்.

      நான் அறிந்த மருத்துவர்கள் சிலரிடம் பேசிய பொழுது, இதற்கு வாய்ப்பில்லை என்றே தெரிவித்தனர்.

      காரணம் எதுவாக இருப்பினும், சாதாரணக் காய்ச்சலுக்காகச் சென்றவர், கண் மூடியதை மனம் ஒப்ப மறுக்கிறது.

       திரும்பும் திசையெல்லாம், மருத்துவ மனைகள் பல்கிப் பெருகி, ஓங்கி உயர்ந்து வளர்ந்தும், பலன்தான் என்ன?

       விலை மதிப்பிலா உயிரினை, நம் குடும்பத்தின் எதிர்கால நலனை, கடவுளர்கள் என்று எண்ணித்தானே, மருத்துவர்களிடம் ஒப்படைக்கிறோம். அவர்கள் சொல்லுவதை எல்லாம் கேட்கிறோம், மறுதலிக்காமல் செய்கிறோம்.

     கேட்ட பணத்தை எல்லாம், எதற்கு இவ்வளவு? என்று வாய் திறந்து கேளாமல், சிறு முனு முனுப்பு கூட இல்லாமல், சுகமானால் போதும், குணமானால் போதும் என்று, கடன் வாங்கியாவது கட்டுகிறோம்

     ஆனாலும் கடவுளர்கள் கைவிட்டு விடுகிறார்களே.

     இது நியாயமா?

     இழப்பு நமக்கல்லவா.

அள்ளி இடுவது அரிசியோ தாய்தலைமேல்
கொள்ளிதனை வைப்பேனோ கூசாமல் – மெள்ள
முகமேல் முகம்வைத்து முத்தாடி என்றன்
மகனே என அழைத்த வாய்க்கு.
-    பட்டினத்தார்

      


  

44 கருத்துகள்:

  1. அன்னாரது ஆன்மா
    சாந்தி பெறட்டும்....
    ஆழ்ந்த இரங்கல்கள்....

    பதிலளிநீக்கு
  2. ஆறுதல் சொல்ல வார்த்தைகள் இல்லை நண்பரே! இக்கால மருத்துவர்களின் தொழில் திறமை பெரும்பாலும் ஐயப்பாட்டுக்கு உரியதாகவே இருக்கிறது. பரீட்சை எழுதி பாஸ் ஆனார்களா, பணம் கொடுத்து பாஸ் ஆனார்களா என்ற கேள்விக்கு பதிலே இல்லை.

    நல்ல மருத்துவர்கள், கல்வித்துறைக்கு வருவதில்லை என்பதால் திறமை குறைவானவர்களும் தன்னம்பிக்கை குறைவானவர்களும் மருத்துவக் கல்வியாளர்களாக மாறிவிடுகிறார்கள். தமக்கே தெரியாத ஒன்றை இவர்கள் எப்படிக் கற்பிக்க முடியும்? எங்கள் ஊருக்கு அருகிலுள்ள இரண்டு தனியார் மருத்துவக் கல்லூரிகளை பலமுறை நேரில் சென்று அனுபவித்த வாய்ப்பினால் இப்படி எழுதும் உறுதி எனக்கு ஏற்பட்டிருக்கிறது. எனவே, மருத்துவமனையின் திறமையை மட்டுமே நம்பி, அதுவும், வாய்மொழியாகவே பரவிய பெருமைகளை நம்பி, அங்குள்ள கருவிகளின் திறனை மட்டுமே நம்பி, நாம் சென்று சேர வேண்டியதாகிறது. 'பலனை எதிர்பாராமல் செயலாற்று' என்று கண்ணன் கூறியது நமது நோயாளிகளுக்கு மிகவும் பொருந்தும். பலன் கிடைக்கும் என்று எதிர்பார்க்காமல், மருத்துவமனைக்கு நாம் தரவேண்டிய முன்பிறவிக் கடனை பைசா குறையாமல் தந்துவிட்டு, அதே மருத்துவமனையின் வளாகத்தில் இருக்கும் பிள்ளையார் கோயிலின் திருநீற்றை அணிந்துகொண்டு காத்திருக்கவேண்டியதுதான்! -இராய செல்லப்பா.

    பதிலளிநீக்கு
    பதில்கள்
    1. பல தனியார் மருத்துவ மனைகளில் இரவு நேரங்களில் உடனடி யாக
      வியாதி என்ன எனக் கூட புரிந்து கொள்ளாத டாக்டர்கள் (!) செயல்படுவதைக் காண்கையில் அரசாங்க மருத்துவ மனைகள் எவ்வளவோ தேவலை என்று தான் படுகிறது.

      ஆனால், அங்கே வேற விதமான சூழ்நிலை.

      இருந்தாலும், ஒன்று சொல்ல வேண்டும்.

      மருந்து கொடுப்பது மருத்துவன் கடமை.
      ஆரோக்கியத்தைத் திரும்பவும் அளிப்பது ஆண்டவன் அருள்.

      சித்தர் வாக்கியங்கள் பொய்யாகாது.

      சுப்பு தாத்தா.

      நீக்கு
  3. மிகவும் வருத்தமாக உள்ளது அண்ணா...மருத்துவர்கள் தான் அந்த நேரத்தில் கடவுளாக ..இன்று அவர்களே பணம் பிடுங்கும் கொள்ளிவாய்ப்பிசாசுகளாக...

    பதிலளிநீக்கு
  4. வணக்கம்.
    ஐயா.
    தகவலை படித்தபோது வேதனையாக இருந்தது. சாதரன காய்ச்சல் வந்ததால் இந்த நிலையா..பாடல்கள் ஒவ்வொன்றும் சிறப்பு பட்டினத்தார் பற்றிய தகவலையும் அறிந்தேன்.

    -நன்றி-
    -அன்புடன்-
    -ரூபன்-

    பதிலளிநீக்கு
  5. கடவுளும் சாட்சி சொல்ல வரப் போவதில்லை ,பூலோகத்துக் கடவுளர்களும் செய்த தவறைச் சொல்லப் போவதில்லை !

    பதிலளிநீக்கு
  6. சமீபகாலமாக இப்படித்தான் எதிர்பாராத மரணங்களைப்பார்த்துபர்த்து மனம் வெறுத்துப்போயிருக்கிறது. ஒரு புறம் அதிர்ச்சி இன்னும் தாக்கிக்கொன்டிருக்க, மறுபுறம் பாதிக்கப்பட்டிருப்பவர்களுக்கு ஆறுதல் சொல்லக்கூட வார்த்தைகளைத் தேடித்தேடி தவிக்க வேண்டிய நிலை! அந்த நிலையில் நீங்களும் இருப்பது மனதிற்கு மிகவும் வருத்தத்தைத் தருகிறது! துணையை இழந்து தவிக்கும் உங்கள் நண்பருக்கும் சினேகிதியை இழந்து வருத்தத்தில் ஆழ்ந்திருக்கும் உங்கள் மனைவிக்கும் உங்களின் ஆறுதல் மொழிகள் மட்டுமே மருந்து! திருமதி. சீதாலக்ஷ்மிக்கு என் அஞ்சலிகள்!!

    திருவெண்காட்டில் பிறந்து திருவொற்றியூரில் மறைந்த பட்டிணத்தாரின் பாடல்கள் வாழ்க்கையின் நிலையாமையை முகத்தில் அறைவது போலச் சொல்கிறது!!

    பதிலளிநீக்கு
  7. பதிவைப் படிக்கப் படிக்க இதைப் போல்
    காரணம் தெரியாது அல்லது அற்று இழந்த
    நண்பர்கள் உறவினர்களின் நினைவும்
    தொடர் மனம் மிக வேதனைக் கொள்கிறது

    அவர் ஆன்மா சாந்தியடைய பிரார்த்திப்போம்

    பதிலளிநீக்கு
  8. அன்னார் தம் ஆன்மா சாந்தி பெறட்டும்..
    ஆழ்ந்த இரங்கல்கள்...

    பதிலளிநீக்கு
  9. வேதனைக்குறிய விடயம் அன்னாரின் ஆன்மா சாந்தியடையட்டும்
    எதிர்காலங்களில் மருத்துர்களின் நிலைப்பாடு இன்னும் மோசமாக போகும் என்பது உண்மை கடவுள் உண்டு என்பது இது போன்ற நிலையில் மேலும் ஐயமாகின்றது....

    த.ம + 1

    பதிலளிநீக்கு
  10. ஆழ்ந்த இரங்கல்கள் நண்பரே...
    மருத்துவமனைகள் அப்படித்தான் இருக்கின்றன..மனங்களை விட்டு இயந்திரங்களை நம்பும் காலம் இது...

    காலம் மாறும்.....மாற்றும்..

    பதிலளிநீக்கு
  11. பல பெரிய ஹாஸ்பிடல் களில் இது போன்ற நிலைமை உள்ளது . நான் நிறைய அனுபவித்திருக்கிறேன் .
    அவர் ஆன்மா சாந்தியடையப் பிரார்த்திப்போம்.

    பதிலளிநீக்கு
  12. இந்த கருத்து ஆசிரியரால் அகற்றப்பட்டது.

    பதிலளிநீக்கு
    பதில்கள்
    1. எனது ஆழ்ந்த இரங்கலை திருமதி சீதாலட்சுமி குடும்பத்தாருக்கு தெரிவித்துக் கொள்கிறேன்.

      நீக்கு
  13. படிக்கும் போதே மனது மிகவும் கஷ்டபடுகிறது.
    நெருங்கிய நண்பர்கள் மரணம் கொடுமை.
    காலம் தான் மனவருத்ததை மாற்றும்.
    அவர்கள் குடும்பத்தினர்களுக்கும், மற்ற நட்புகளுக்கும் ஆழ்ந்த இரங்கல்கள்.

    பதிலளிநீக்கு
  14. வேதனையான நிகழ்வு. அதிலும் வேதனை என்னவென்றால் அதுதான் இப்போது இயல்பாக எங்கும் நடந்துகொண்டிருக்கின்றது. ஆழ்ந்த இரங்கல்கள்.

    பதிலளிநீக்கு
  15. வருத்தம் தந்த நிகழ்வு. பல மருத்துவமனைகளில் பணம் சம்பாதிப்பது மட்டுமே குறிக்கோளாக இருக்கிறது....

    ஆழ்ந்த இரங்கல்கள்.

    பதிலளிநீக்கு
  16. இதுவும்கடந்துபோகும் ஐயா மரணம் என்பது ஒரு விதத்தில் விடுதலையே நமக்குத்தான் மறதி என்னும் வரம் இருக்கிறதே மறைந்தவருக்கு ஆழ்ந்த இரங்கல்கள்

    பதிலளிநீக்கு
  17. மிகவும் வருத்தமான நிகழ்வு ஐயா...
    அவரின் ஆன்மா சாந்தியடையட்டும்.

    பதிலளிநீக்கு
  18. மிகவும் கவலையான விடயம் இன்று மருத்துவர்கள் மீது நம்பிக்கை வைப்பது என்பது சந்தேகிக்கவேண்டிய நிலையாப்போச்சு.அன்னாரின் ஆத்மா சாந்தியடையட்டும்.பட்டினத்தார் பாடல் எனும் அழியாது.

    பதிலளிநீக்கு
  19. அன்புள்ள கரந்தையாரே!

    மருத்துவக்கடவுள்கள் சில நேரங்களில் அலட்சியமாகத் தவறித் தப்பு செய்துவிடுகிறார்கள்.

    ‘தவறு என்பது தவறிச் செய்வது

    தப்பு என்பது தெரிந்து செய்வது


    தவறு செய்தவன் திருந்தப் பார்க்கணும்

    தப்பு செய்தவன் வருந்தியாகணும்...’

    அனுபவம் இல்லாமலும் போலியாகவும் மருத்துவர்கள் இருக்கிறார்கள்!

    மனிதஉயிரில் யாரும் விளையாடக்கூடாது...! தங்களால் இயலாது என்றால் உண்மையை உடனே கூறி வேறு நல்ல மருத்துவரிடம் உயரிய மருத்துவமனையில் அனுமதிக்க வழிவகை செய்ய வேண்டும்.

    தங்களுக்கு வருமானம் மட்டுமே குறியாகக் கொண்டு செயல்படுவதை தவிர்க்க வேண்டும்.

    நன்றி.

    த.ம. 9

    பதிலளிநீக்கு
  20. அவர் ஆன்மா சாந்தி அடையட்டும்

    பதிலளிநீக்கு
  21. மனம் வருந்துகிறோம் ஐயா...

    பதிலளிநீக்கு
  22. மனம் வேதனையில் ஆழ்ந்தது. பல வருடங்கள் முன்னர் இப்படித் தான் எங்கள் எதிர்வீட்டுக்காரரின் தகப்பனார் அறுபது வயதே நிறைந்தவர் சாதாரணமாகச் செக்கப்புக்குப் போய்விட்டுத் திரும்புகையில் பிணமாக வந்தார்! அதிர்ச்சி அடைந்தோம்! இதுவும் அது போல் தான் இருக்கிறது! என்ன சொல்லி அந்தக் குடும்பத்தைத் தேற்றுவது! ஆனால் சில மருத்துவர்கள் காசு பண்ணுவதில் காட்டும் ஆர்வத்தை நோயாளியைக் கவனிப்பதில் காட்டுவதில்லை என்பதும் உண்மை! செலைன் அல்லது க்ளூகோஸ் ஏற்றி இருந்தால் ஒருவேளை அவர் உயிர் பிழைத்திருக்கும் வாய்ப்பு உண்டு! :(

    பதிலளிநீக்கு
  23. Just returned from native place.Deeply regreted to know the sad demise of some one dearer to your family My whole heart codolonces.

    பதிலளிநீக்கு
  24. ஆழ்ந்த அனுதாபங்கள்!
    கடும் வயிற்றுப்போக்கு இருந்தவருக்கு நீராதாரம் நரம்பூடு ஏற்றுவதுதானே வைத்திய முறை, இதை ஏன் செய்யவில்லை. ஆச்சரியமாக உள்ளது.
    எங்கள் உறவு 29 வயது, ராஜஸ்தானில் பொறியியலாளர், காச்சல் மருந்து கொடுத்துள்ளார்கள். 13ம் நாள் மீண்டும் வைத்தியசாலையில் அனுமதி, வைரஸ் ஈரலில் தாக்கிவிட்டதாம்.சத்திர சிகிச்சை, 19 லட்சம் - கட்டணம் கட்டும்படி கூறியுள்ளார்கள்.பண ஒழுங்குகள் செய்து கட்டுமுன், அவர் உயிர் பிரிந்து விட்டது. அருகில் நண்பர்கள் இருந்ததால் மரணமென்பதை வைத்தியசாலை அறிவித்து விட்டது. (ரமணா பாணி வைத்தியம் செய்யவில்லை. நாளை சென்னையில் சடங்கு!
    இலங்கையில் இருந்து உயிர்காக்க தப்பி வந்தவர்கள். மிகச் சிரமத்துள் முன்னுக்கு வந்தவர்களை, எந்தக் கடவுளும் காப்பாற்றவில்லை.
    எங்கே தவறுகள் என சாதாரண நமக்கு புரியவில்லை. நம் நாடுகளில் புரிந்த வைத்தியர்கள், வர வர புதிராகவே செயற்படுகிறார்கள்.

    பதிலளிநீக்கு
  25. அன்னார் தம் ஆன்மா சாந்தி பெறட்டும்..
    ஆழ்ந்த இரங்கல்கள்...

    பதிலளிநீக்கு
  26. ஆம், மனம் ஓப்ப மறுக்கிறது. இரங்கல்கள்.

    பதிலளிநீக்கு
  27. மனம் கலங்குகிறது அய்யா

    பதிலளிநீக்கு
  28. மனம் கலங்குகிறது அய்யா

    பதிலளிநீக்கு
  29. மனம் கலங்குகிறது அய்யா

    பதிலளிநீக்கு
  30. அன்னாரின் ஆன்மா சாந்தியடைய பிரார்த்திப்போம்.

    பதிலளிநீக்கு
  31. anbulla jayakumar

    enraikkuk kalvi kaasukku enru aakiponatho anraikke manitha inam azivai nokkip poyvittathu. ini uyirkkolaithaan.

    பதிலளிநீக்கு
  32. இதயம் சற்று நின்று இயங்குகிறது..
    அன்னை சீதாலட்சுமியாரின் இதயம் சட்டென நின்ற விதத்தை படித்தபோது..உயிர் காக்கும் மருத்துவர்களில் சிலர் இதயம் இல்லாமல் சேவை செய்யும் விதத்தை காணும் போது என் இதயம் மீண்டும் நின்று இயங்குகிறது. அன்னாரது மறைவுக்கு ஆழ்ந்த இரங்கல்.

    பதிலளிநீக்கு
  33. ஆழ்ந்த இரங்கல்கள் அய்யா

    பதிலளிநீக்கு
  34. ஏதோ பட்டினத்தார் ஸ்வாமிகள் குறித்த பதிவு என்று துவங்கினேன்..

    நிறைய சிந்தனைகளை தந்த அந்த பாடல் வேறு...

    கடைசியில் தீராத் துயருடன் ஒரு பிரியா விடை..

    வருத்தங்கள் தோழர்..
    டீ ஹட்ரேசனுக்கு கூடவா ஒரு மருத்துவம் இல்லை வருத்தங்கள் தோழர்..

    அம்மையாரின் ஆத்மா சாந்தியடையட்டும்

    பதிலளிநீக்கு
  35. தேர்தல் காலம் அல்லவா

    இன்னுமொரு ஒட்டு

    பின்னர் இரண்டு தகவல்கள் ..
    ஒன்று ஒரு பிரபல வார இதழ் ஒன்றின் ஆசிரியரின் தந்தை இங்கே பட்டினத்தார் கோவிலில்தான் இருப்பார்.

    அந்த ஆசிரியரின் அக்கா எங்கள் வீட்டின் பின்னால் குடியிருந்ததால் அவருடன் பரிச்சியம் உண்டு..(தராசு நினைவில் இருக்கா ?)

    அவருடைய நினைவு வந்தது.

    முப்புரம் குறித்து தகவல்களைத் திரட்ட வேண்டும்...

    ஆதி குடிகளை அழித்த விசயம் அது என்று பேரா.அருணன் குறிபிடுகிறார்.

    படிக்கோணும் நிறைய

    பதிலளிநீக்கு
  36. மனதைப் பாதிக்கும் துயர நிகழ்வு. அன்னாரின் குடும்பத்தாருக்கு என் ஆழ்ந்த இரங்கல்கள்.

    பதிலளிநீக்கு
  37. துள்ளித்திரியும் பள்ளிப்பருவத்தில் அம்மா என்றால் ஏற்படும் ஆனந்தமே தனி. இளைஞனாக ஓடித்திரிந்த காலத்தில் அம்மா நல்லதைச் சொன்னாலும் அதை மனம் ஏற்றுக்கொள்ள மறுத்து முறுகல் ஏற்பட்டதும் உண்டு. வயது நாற்பது தாண்டிய பின் அம்மாவுடன் எப்போதும் இருக்க வேண்டும் என்று ஆண்டவனை வேண்டியதுண்டு. டாக்டர்களாலும் மருந்துகளாலும் அம்மாவின் உயிரை காப்பாற்ற முடியவில்லை என்னும்போது கண்களில் வருவது நீரா அல்லது இரத்தமா

    பதிலளிநீக்கு

அறிவை விரிவு செய், அகண்ட மாக்கு, விசாலப் பார்வையால் விழுங்கு மக்களை, அணைந்து கொள், உன்னைச் சங்கம மாக்கு, மானிட சமுத்திரம் நானென்று கூவு